لهجتي تحت المجهر :)

أموت في اللهجة الحساوية حيييييل ..

أحسها حركات يمكن أفهم كل الكلمات بس نصها

ما أقولها .. أسمع أهلي يقولونها ..

و بحكم أني أختلط بأشخاص مو من الشرقية ..

بس لازم يوم أكون مع أهلي تجي كلمة كذا و إلا كذا ..

فقررت أني أعلمكم كذا كلمة بس خطيرين موووت و من دون

ضحك و إلا برااااا >> بتتسطر ..

و بفهمكم وش معناها .. :)

فلنبدأ :

أولاً قبل أبدا بالكلمات ..

ترى و كوني من الأحساء ترى بدل ما نقول للبنت ..

أحبك نقول أحبج ..

ليش ما أدري خلاص كذا لهجتنا ..

و بعد ..

مثلاً لو بقول لوحده تجيب كتابي ما اقول لها ..

جيبي كتابي لا أقول جيبي كتابيه ..

و كل شي يكون ملكي ألحقه بالهاء ..

يعني ..

جوالي = جواليه ..

دفتري = دفتريه ..

لاب توبي = لاب توبيه >> :)

و غيرها الكثير الكثير ..

الكلمات :

شذا = كذا يعني مثلاً وحده تسأل عن شي مستغربه منه أقول لها : أهو شذا ..

منطّول = مرمي يعني مثلاً أسأل عن جوالي يجيني أخوي يقول هو منطّول في الصالة ..

مغتلق = ضايق صدره هذي مفهومه ..

أمحق = يعني مالت عليك .. و بعد هذي مفهومه ..

دهريز = تعني مدخل البيت ..

زط = يعني مشفوح على الأكل .. أقول مثلاَ لأخوي ايه زط زط .. :)

حمولة = مو شي محمول لا يعني عايلة قبيلة هاللون :)

طبينه = هذي اسم ريحة النخيل إذا حرقوه ..

تراشي = حلق الأذن ..

معاضد = أساور ..

شحقه = يعني ليش ..

يزنط = يعني يخنق .. واحد يمسك رقبة الثاني يعني يزنطه ..

زهبه = يعني جهزه .. واحد يقول لأخوه زهب ثوبي يعني جهزه ..

ينشب = يعني يحطون الغدا .. الأم قاعده تنشب الغدا :)

طرطور = يعني واحد ما عنده شخصية ..

فريج = يعني الحي .. مثلاً حي النخيل يعني فريج النخيل :)

أما هذي الكلمه يا هي خطيرة ..

رياري = يعني سعابيل >> حطيتها للمعلومة فقط ههههه ..

انطم = يعني اسكت ..

ازعق = يعني ناد .. الأم تقول لولدها أزعق لأخوك يعني ناده ..

مطيّور = يعني خبل مو عاقل ..

ألمّك = يعني أضمك ..

الموسدة = يعني المخده الوسادة ..

عصقول = يعني ضعيف مرررره أقول لواحد أنت عصقول يعني ضعيييف حيل ..

منتفخ = ذا واحد دبه يعني متين يعني سمين و تختلف المسميات و الهدف واحد :)

زغم = يعني رشفه من شي .. يقول لوالد لأمه بس أبغى زغم من الشاي يعني رشفه ..

شمخ = جرح صغير ..

ذبي = يعني أرمي .. الأم تقول لبنتها ذبي المنديل من جنبك يعني أرميه ..

و هذي من أجمل الكلمات قميظة = حسافه :)

الناس مول = يعني الوقت متأخر ..

لفد = يعني دبق يجيك واحد لفد يعني يلصق فيك مثل العسل دبق ..

امردقك = يعني أضربك بقوة ..

هبابك = يعني عساه يمديك ..

أدِن = يعني وسعّ لي مكان ..

الصكة = يعني الشارع ..

امبطح = يعني انسدح و اتمدد ..

يتصوّخ = يعني يتسمع من دون ما أحد يدري ..

أمهي = يعني تعالي :)

طقج عرج = يعني اممم مثلاً وحده معصبه يقولون لها هدّي لا يطق لج عرج :)

دريشة = يعني نافذة ..

مختربه = يعني منعفسه فيها شي غلط ..

منتكسه = يعني منقلبه فوق تحت ..

هذي الكلمه خطيرة صمنديقة = يعني موجود بلا قيمة و لا فائدة هههههههه

عمبداك = يعني من صدق ..

أمداك = يعني مثلاً الولد قاعد يحل الواجب و خلص تقول له الام أمداك خلصته ..

خرجه = يعني قماش ..

بيّزيه = يعني لمعيّه .. مثلاَ الأم تقول لبنتها بيزّي الطاوله يعني لمعيها ..

بارحة اللوله = يعني ليلة أمس ..

الجابله = يعني بكره في الليل ..

القابله = يعني بعد بكره بالليل ..

كبت = يعني دولاب ..

مخمّه = يعني مكنسه ..

عسو = ذا يبغى له تفسير كبير الحين النخل مو يجي منه رطب >> حلفي ..

هذا لم يقطعون الرطب كله الغصن ما ادري القطعه الخشبية إلي كان عليها الرطب

ياخذونهم و يجمعونهم و يربطون نهايتهم و يصير مثل المكنسة ينظفون به

المكان :)

أصمخّ = يعني واحد ينادونه و لا يسمع ..

كشه = صاحبة الشعر المنفوش و المنكوش :)

عَبَاَرةَ = يُراعي نطقها بالحركات يعني شخص يبغى يوضح شي ..

بادية = هذي إناء عميق إلي يحطونه به الشوربه :)

شحليله = هذا مثلاً وحده تشوف ولد حلو تقول شحليله تصغّير لحلو يعني ..

صطحي الهريسة = الهريسة أكله شعبية لما يحطونها في صحن تاخذ وحده ملعقة و ترتبها صحيها يعني رتبيها ..

غرشة = يعني قارورة ..

مليق = يعني يا كثر ما يملل غيره و مليق من الملاقة و تجي بمعنى السخافة ..

لا تتطنز = يعني لا تتريق أو تتمصخر ..

أوريك دروبك = يعني أوريك الهوايل :)

أولم لج = يعني أجهز لك ..

وخّر أو أدِن أو دز = يعني بعّد أو ابتعد ..

أمبطيت = يعني وحده اكلت كل إلي في السفرة و تقول أمبطيت يعني شبعت حيل ..

هبشه = يعني واجد أو كثير ..

زحلوقه = هذي اللعبة إلي يكون فيها سلّم و نصعد عليه و نتزحلق لتحت :)

درّوفه = هذي برضو لعبة بس إلي نجلس عليها و حد يدفنا ..

شلاّخ = يعني يكذب و بقوة ..

يشدّخه = يعني يضربه ..

في كلمة يقولها أبوي بس خطيرة ..

تكمكمي = تعني لو مثلاً لابسه العباية و كانت مفتوحه يقول تكمكمي يعني سكريها أو لمّيه يعني أمسكها :)

تَيّتَهَ = هذي تعني لو مثلاً صنبور الماي مفتوح يقولون تيتّه يعني سكره :)

هّمش = و هذي تعني هيا أمشي :)

تهقى = يعني لما تقول لأحد تتوقع ..

حزة = يعني وقت ..

هذي الكلمة لعيون أختي بكتبها و لو أني مع كثر ما انقالت لي أحسها ما ادري شلون ..

عاشون عيل = يعني اشلون أجل .. >> الله يخلف على هالكلمة حدهاااا ما ادري شلون ..

عدل = يعني زين كويس حلو ..

شلون = يعني كيف .. واحد يقول للثاني شلونك يعني كيفك ..

:)

أتمنى أكون عطيتكم صورة للهجتنا الخطيرة ..

ترى هذي اللهجة كلها للحساويين يشترك بعض الأفراد

من المنطقة الشرقية فيها ..

. . .

أنا ما أستغرب أنو ممكن لو جمعنا كل لهجاتنا العربية تجي

ضعف لهجات العالم هههههه ..

/

تحياتي ..